娛頭
勒令禁咀封胸 陳豪陳茵媺澳洲結婚
2012年10月11日陳豪陳茵媺這對正牌熒幕情侶，罕有地獲外間一致睇好，只此一對！拍拖一年零八個月，兩人恩愛度有增無減，現年四十一歲的陳豪鎖定女友做豪嫂，心急結婚；經過多次求婚，陳茵媺終於 say yes！落實明年正式做陳太，二人更決定在澳洲結婚。
為進一步將陳茵媺私有化，陳豪下了禁令，嚴禁女友與其他男演員演出親熱戲，包括幕前性感演出也要煞停，雖然明知這些規條會有礙演藝事業發展，但準豪嫂為了顧及男友感受，一一答應。
拍拖睇戲
陳豪陳茵媺拍拖，日子愈長愈愛得癡纏，當事人感情有增無減，不時公開打情罵俏。星期日（十月七日）下午一點半，陳茵媺駕駛她的 Benz，與男友雙雙離開深井碧堤半島同居愛巢，到九龍站圓方睇戲。當發現有記者，二人面帶冧笑沒有抗拒，企定任影。
拍拖睇《救參 96小時 2》，為免被騷擾，陳豪刻意買貴一倍價錢的尊貴影院戲飛，坐頭等飛機座椅，好讓女友睇戲舒舒服服。
睇完戲，陳豪咖啡癮起，買了杯咖啡兩份飲，堂堂大男人的陳豪更加做足本分，幫女友攞手袋，到發現被記者鏡頭「瞄住」，他才尷尷尬尬，將手袋交還女友。之後打道返深井寓所，繼續二人世界。
求婚半年
四十一歲的陳豪，早已認定陳茵媺是結婚對象，即使口講願意多給女友兩年時間，衝刺事業，但實則心急如焚，希望盡快成家立室，將陳茵媺正式據為己有。
半年前開始，陳豪多番向陳茵媺求婚，兩個月前，終於得到女友答應。近日被問到有關幾時結婚的問題，陳豪都轉曬口風，由之前答「呢啲（結婚）遲啲先講，仲要努力搵錢」到最近改口表示「我會努力帶好消息俾大家，我都展望有更好嘅將來。」
「阿 Mo（陳豪）呢排心情真係勁靚，問佢係咪好事近就笑曬，個樣冧到爆，其實阿 Mo一直有構思結婚想點要點，佢講過想喺澳洲行禮，因為有好多親戚同讀書時期識嘅朋友喺嗰邊， Aimee（陳茵媺）有啲屋企人就喺加拿大，飛過去都好方便。佢唔係好想喺香港大搞，驚似做騷，但阿 Mo話都要考慮女友屋企人想法，會尊重外父決定。」陳豪身邊人說。
據知，陳豪同陳茵媺已有共識，按計劃婚禮於明年下半年舉行，待陳豪與黎耀祥拍完一套關於律政題材新劇，便會攞假籌備婚禮。
收起性感
陳豪在外國長大，但他思想傳統，也十分大男人，他可以對女友千依百順，卻接受不到女友在幕前與其他男演員拍親熱戲，連幕前性感演出，也介意！
近年無綫為了催穀收視及製造話題，經常在劇集中加插花旦性感演出，稍為露多啲，亦足以引起極大迴響，連帶花旦也可藉此成功上位；選美出身的陳茵媺，著泳衣示人無難度，經常於劇中著泳衣出鏡，在處女劇《原來愛上賊》中，她便以著住條疑似 T-back，擺出趷籮誘人 pose，成功突圍，快手攞埋「飛躍進步女藝員」。
之後在《真相》一場火辣被姦戲，以及在《法證先鋒 3》剝衫除剩 bra一幕，同樣唔錫身，話剝就剝搏到盡，但男友開到聲話介意，陳茵媺唯有聽話，向公司提出不再幕前性感要求。故此，同陳豪拍拖後接的《天梯》，劇中同樣有一場強姦戲，但尺度與《真相》比較，相差一大截，戲中陳茵媺只是被人推落地，然後扯開衫鈕，露出半邊膊頭，當作交代被姦，相當兒戲。往後再接拍的《情越海岸線》，故事發生在長洲，有不少沙灘戲，監製原本想陳茵媺泳衣演出，同樣遭她拒絕，只肯背心短褲出鏡。
「奶奶」監場
陳茵媺聽教聽話，所以甚得未來奶奶愛錫，亦想盡快飲到這杯新抱茶。中秋節（九月三十日）當日，豪媽更神秘現身《天梯》宣傳活動，與兒子及未來新抱一齊過節。當日豪媽刻意低調，坐埋一邊睇住陳豪同「新抱仔」在台上玩遊戲，見到大家攞二人的戀情開玩笑催婚，坐在台下的豪媽笑到見牙唔見眼。
為免被現場記者發現，要求「婆媳」合照，陳茵媺同豪媽有默契地刻意扮唔熟，但當陳茵媺行過「奶奶」身邊，二人又忍唔住互打眼色。做完活動，陳豪同陳茵媺分頭離開，陳茵媺先返回深井寓所，為晚上的晚飯做準備，當晚除了豪媽外，陳豪的哥哥亦在場，「一家人」過節，陳茵媺已經完全被當是自己家人。
聽教聽話
對於答應陳豪求婚，明年正式成為豪嫂，陳茵媺難掩興奮心情大笑。
「哈……未咁快，慢慢嚟啦，你哋（記者）唔好成日催我啦！（見曬家長未？）都有見過，屋企人對佢都 OK。（陳豪係唔係唔鍾意你拍親熱戲同性感戲？）《天梯》嗰場強姦戲，拍得好含蓄，又唔使 sexy，我好鍾意呢種手法，其實我哋都係演員，只要劇情需要拍，乜嘢都 OK嘅，最多劇集出街嗰陣，唔睇對方嘅親熱場面囉！」陳茵媺喜歡含蓄的說法，已完全配合陳豪要求，呢個「老婆」咁聽話，難怪陳豪要盡快做埋啲手尾！
性感回憶錄
坐擁 34D身材的陳茵媺，參選港姐「巨咪」已是外界焦點，之後無論出席公開場合、拍劇， Aimee也會穀胸上陣，有「咪神」之稱。
結婚勝地
澳洲是熱門的結婚地點，圈中多對情侶，包括徐子淇、李家誠，張家輝、關詠荷，黎姿、馬廷強，何超儀、陳山聰、劉青雲、郭藹明，同樣選擇在澳洲拉埋天窗。
徐子淇、李家誠
06年 12月，徐子淇下嫁恒基太子爺李家誠，一對新人在澳洲悉尼歌劇院對岸的 Royal Botanic Gardens舉行世紀婚禮，估計開支過億。
黎姿、馬廷強
09年 1月，黎姿與富商馬廷強秘密到澳洲教堂註冊結婚，之後飛歐洲度蜜月，回港後才公布喜訊，並一連兩晚在半島酒店補擺喜酒。
張家輝、關詠荷
03年尾，拍拖十年的張家輝與關詠荷於澳洲悉尼註冊結婚，為避開傳媒耳目，二人選擇在當地一名婚姻註冊官家中舉行儀式，並只邀請了雙方約 15名親友，出席在餐廳舉行的小型婚宴。
剝上位
無綫為了穀收視，不時安排女藝人在劇中性感演出，花旦、姐仔只要肯搏肯露，上位話咁易。
陳敏之
去年出街的《怒火街頭》，飾演「一樓一索腿天後」的陳敏之，在劇中經常以超短熱褲上陣，其中一幕講她在街頭裸跑追賊，成功出位攞埋「最佳女配角」。
岑麗香
近期人氣急升的岑麗香，在《巴不得媽媽》中有不少性感鏡頭，除了剝 bra為錢嘉樂包紮，更兩度以泳衣示人，其中一幕著住泳衣的香香公主，用蒸餾水淋身，大玩濕身誘惑。
徐子珊
在新劇《雷霆掃毒》飾演道友婆的徐子珊，在一幕講述她偷聽毒販情報被困凍櫃，獲救後林峯要除了她身上的衣服，再將她放入熱水急救。
陳法拉
先在《師奶兵團》著三點式幫郭政鴻推油一幕火爆上位，之後在《有營煮婦》時，其中一幕剝衫露 bra如廁戲，更引起全港觀眾留意，無綫接到近 30宗投訴，指法拉在鏡頭前剝剩個 bra，意識不良。
